ଢେଙ୍କାନାଳ : ସାଂସଦ ଅପରାଜିତା ଷଡଙ୍ଗୀଙ୍କର ପଦ୍ମପୁର ଗସ୍ତ ଅବସରରେ ଢେଙ୍କାନାଳ ରେଳଷ୍ଟେସନ୍ ଠାରେ ଅପରାଜିତା ଷଡଙ୍ଗୀଙ୍କୁ ବିବିଧ ସଂଗଠନ ଦ୍ୱାରା ସ୍ୱାଗତ କରି ସମ୍ବର୍ଦ୍ଧନା ଦିଆଗଲା ।
ରେଳଯାତ୍ରା ବିଳମ୍ବ କାରଣରୁ ରାତ୍ର ୧୧ଟା ସମୟ ହୋଇଗଲେ ମଧ୍ୟ ଅନେକ ଲୋକ ଏହି ସମ୍ବର୍ଦ୍ଧନା କାର୍ଯ୍ୟରେ ଯୋଗଦାନ କରିଥିଲେ । ଆନ୍ତର୍ଜାତୀୟ ପାର୍ଲାମେଂଟ୍ରେ ନିର୍ବାଚିତ ହୋଇ ଭାରତ ପାଇଁ ଗୌରବ ଆଣିଥିବାରୁ ଢେଙ୍କାନାଳ ସଚେତନ ନାଗରିକ ଫୋରମ୍ର ସମ୍ପାଦକ ଭରତ କୁମାର ଦାସ ତାଙ୍କୁ ଉତରୀୟ ଦେଇ ସମ୍ବର୍ଦ୍ଧନା ଜଣାଇଥିଲେ ।
ପୂର୍ବତନ ଢେଙ୍କାନାଳ ଜିଲ୍ଲା ସାମ୍ବାଦିକ ସଂଘ ସଭାପତି ଶଶିମୌଳି ରଥ ଏବଂ ଢେଙ୍କାନାଳ ବଣିକ ସଂଘ ସଭାପତି ରାଜେନ୍ଦ୍ର ଦାସ ପୁଷ୍ପଗୁଚ୍ଛ ଦ୍ୱାରା ସ୍ୱାଗତ କରିଥିଲେ । ଅପରାଜିତା ଷଡଙ୍ଗୀ ସ୍ୱାଗତ ସମିତିର ଅଧ୍ୟକ୍ଷ ବିଶ୍ୱନାଥ ବେହେରା ଏବଂ ଯୁବ କାର୍ଯ୍ୟକର୍ତା ଲକ୍ଷ୍ମୀକାନ୍ତ ସାହୁ ଢେଙ୍କାନାଳ ଜିଲ୍ଲାରେ ପ୍ରଚଳିତ ହୋଇଥିବା ମଗ୍ଜି ଲଡୁ ପ୍ରଦାନ ପୂର୍ବକ ଜି.ଆଇ. ଟ୍ୟାଗ୍ ବାବଦରେ ଆଲୋଚନା କରିଥିଲେ ।
ଢେଙ୍କାନାଳ ବୁଦ୍ଧିଜିବୀ ସଂଘର ସମ୍ପାଦକ ଅଖିଳ ମହାପାତ୍ର, ଦଣ୍ଡପାଣି ଦାସ, ମହେଶ ଅଗ୍ରୱାଲା, ବିକାଶ ହିଣ୍ଡୋଚା ଆଦି ଅନେକ କାର୍ଯ୍ୟକର୍ତା ଉପସ୍ଥିତ ଥିଲେ । କାର୍ଯ୍ୟକ୍ରମକୁ ଫୋରମ୍ର ଉପସଭାପତି ଆଇନ୍ଜୀବୀ ଦୀପକ ପ୍ରସାଦ ପଟ୍ଟନାୟକ ସଂଚାଳନ କରିଥିଲେ ।