ଢେଙ୍କାନାଳ : ତୁମୁସିଂହା ମଣ୍ଡଳର କଦଳୀପାଳ ଠାରେ ବିଜେପି ଜିଲ୍ଲା ସଭାପତି ନରେଶ ଚନ୍ଦ୍ର ମହାପାତ୍ରଙ୍କ ଅଧ୍ୟକ୍ଷତାରେ ଗତ ଜିଲ୍ଲାପରିଷଦ ନିର୍ବାଚନରେ ବିଜେପିର ପ୍ରାର୍ଥୀ ଓ ପ୍ରାର୍ôଥନୀ ମାନଙ୍କୁ ନେଇ ଏକ ବନ୍ଧୁମିଳନ କାର୍ଯ୍ୟକ୍ରମ ଅନୁଷ୍ଠିତ ହୋଇଥିଲା ।
ଏହି କାର୍ଯ୍ୟକ୍ରମରେ ପୂର୍ବତନ ମନ୍ତ୍ରୀ ଅଞ୍ଜଳି ବେହେରା, ରାଜ୍ୟ କାର୍ଯ୍ୟକାରିଣୀ ସଦସ୍ୟ ତଥା କାମାକ୍ଷାନଗର ନିର୍ବାଚନ ମଣ୍ଡଳୀର ବିଜେପି ବିଧାୟକ ପ୍ରାର୍ଥୀ ଶତୃଘନ ଜେନା, ଢେଙ୍କାନାଳ-ଅନୁଗୁଳ ଲୋକସଭା କ୍ଷେତ୍ରର ସଂଯୋଜକ ପ୍ରେମାନନ୍ଦ ଜେନା, ଜିଲ୍ଲା ଉପସଭାପତି ବିଷ୍ଣୁ ପ୍ରସାଦ ଲେଙ୍କା, ଜିଲ୍ଲା ବୁଦ୍ଧିଜୀବୀ ସେଲ୍ ଆବାହକ ପ୍ରମୋଦ ନନ୍ଦ ଅତିଥି ଭାବେ ଯୋଗଦେଇ ଆଗାମୀ ଦିନରେ ସମସ୍ତ ନେତୃବୃନ୍ଦ, କାର୍ଯ୍ୟକର୍ତା ଏକ ହୋଇ କଠିନ ପରିଶ୍ରମ କରି ତୃଣମୂଳ ସ୍ତରରୁ ସଂଗଠନକୁ ସୁଦୃଢ କରିବା ପାଇଁ ଆହ୍ୱାନ ଦେଇଥିଲେ ।
ଜିଲ୍ଲା ସଭାପତି ଶ୍ରୀ ମହାପାତ୍ର ସମାରୋପ ବକ୍ତବ୍ୟ ଦେଇ ଆଗାମୀ ଦିନରେ ସମସ୍ତ ଭେଦଭାବ ଭୁଲି ଏକ ହୋଇ ଦଳକୁ ସଂଗଠିତ କରିବା ସହ ୨୦୨୪ ମସିହା ସାଧାରଣ ନିର୍ବାଚନ ପାଇଁ ପ୍ରସ୍ତୁତି ହୋଇ ରହିବା ପାଇଁ ପରାମର୍ଶ ଦେଇଥିଲେ । ଜିଲ୍ଲା ସାଧାରଣ ସଂପାଦକ ରାସବିହାରୀ ବେହେରା ଅତିଥି ପରିଚୟ କରିବା ସହ ଧନ୍ୟବାଦ ପ୍ରଦାନ କରିଥିଲେ ।
ଏହି ବନ୍ଧୁ ମିଳନରେ ୨୩ଜଣ ଜିଲ୍ଲାପରିଷଦ ପ୍ରାର୍ଥୀ/ପ୍ରାର୍ଥିନୀ, ଅଷ୍ଟଶମ୍ଭୁ ମଣ୍ଡଳ ସଭାପତି, ପର୍ଜଙ୍ଗ ମଣ୍ଡଳ ସଭାପତି, ତୁମୁସିଂହା ମଣ୍ଡଳ ସଭାପତି, ଗୁଣ୍ଡିଚାପଡା ମଣ୍ଡଳ ସଭାପତି ଓ କାମାକ୍ଷାନଗର ନିର୍ବାଚନ ମଣ୍ଡଳୀର ବହୁ ବରିଷ୍ଠ ନେତା ଉପସ୍ଥିତ ଥିଲେ ।