🇮🇳🇮🇳 ସ୍ୱଦେଶ ପ୍ରୀତି ଏବଂ ଇସଲାମ 🇮🇳🇮🇳 ଅନସାର ଅଲୀ ଖାଁ , ସାମାଜିକ କାର୍ଯ୍ୟକର୍ତ୍ତା, ଢେଙ୍କାନାଳ

ବନ୍ଧୁଗଣ ! ଦେଶ ପ୍ରେମ , ଦେଶପ୍ରତି ବିଶ୍ୱସ୍ତତା ଶବ୍ଦ କହିବା କିମ୍ବା ଶୁଣିବା ଅତ୍ୟନ୍ତ ସହଜ, କିନ୍ତୁ ବାସ୍ତବରେ ଏହି ଶବ୍ଦ ଗୁଡ଼ିକର ଅର୍ଥ ଅତ୍ୟନ୍ତ ଗଭୀର ଏବଂ ବିସ୍ତୃତ, ତା’ପରେ ସେହି ଶବ୍ଦର ଅର୍ଥକୁ ସମ୍ପୂର୍ଣ୍ଣ ରୂପେ ଗ୍ରହଣ କରିବା ଏବଂ ସେହି ଶବ୍ଦ ଗୁଡ଼ିକୁ ବୁଝିବା ଏବଂ ସର୍ତ୍ତ ଗୁଡିକର ପ୍ରକୃତ ଅର୍ଥ ଏବଂ ସେମାନଙ୍କର ଆବଶ୍ୟକତା କ’ଣ ଏକ କଷ୍ଟକର କାର୍ଯ୍ୟ।
ଏହି ସଂକ୍ଷିପ୍ତ ବିବରଣୀ ପରେ ସ୍ୱତନ୍ତ୍ରତା ଦିବସର ଏହି ପାବନ ଅବସରରେ ମୁଁ ଦେଶଭକ୍ତି ଏବଂ ଦେଶପ୍ରେମ ସମ୍ବନ୍ଧରେ ଇସଲାମିୟ ଆଦର୍ଶକୁ ସଂକ୍ଷେପରେ ବର୍ଣ୍ଣନା କରିବାକୁ ଚେଷ୍ଟା କରୁଛି।
ଇସଲାମ ଧର୍ମର ପ୍ରତିଷ୍ଠାତା ଦିବ୍ୟ ବାର୍ତାବହ ହଜରତ ମୁହମ୍ମଦ ମୁସ୍ତଫା ସ୍ୱଲ୍ଲଲ୍ଲାହୁ ଅଲୈହି ୱସଲ୍ଲମଙ୍କ ନିତିଶିକ୍ଷା ହେଉଛି “ଦେଶପ୍ରେମ ଧର୍ମ ବିଶ୍ଵାସ ର ଅବିଚ୍ଛେଦ୍ୟ ଅଙ୍ଗ ବିଶେଷ”। ତେଣୁ ଇସଲାମ ନିଷ୍ଠାପୂର୍ଣ ଦେଶଭକ୍ତି ଆବଶ୍ୟକ କରେ। ଇଶ୍ଵର ଏବଂ ଇସଲାମ କୁ ପ୍ରେମ କରିବାର ଯଥାର୍ଥତା ଏହା ବ୍ୟକ୍ତ କରୁଛି ଯେ ଜଣେ ବ୍ୟକ୍ତି ନିଜ ଦେଶକୁ ଆନ୍ତରିକତା ସହିତ ପ୍ରେମ କରୁ। ଏଥିରୁ ଏହା ସୁସ୍ପଷ୍ଟ ହେଉଛି ଯେ ଈଶ୍ୱର ଙ୍କୁ ଭଲ ପାଇବା ଏବଂ ସ୍ୱଦେଶକୁ ଭଲ ପାଇବା ମଧ୍ୟରେ କୌଣସି ବିଭେଦ ନାହିଁ। ଯେହେତୁ ସ୍ଵଦେଶ ପ୍ରୀତି ଇସଲାମର ଏକ ଅଂଶ ବିଶେଷ, ତେଣୁ ଦେଶ ଭକ୍ତିର ସର୍ବୋତ୍ତମ ଶିଖରରେ ପହଁଚିବା ପାଇଁ ଚେଷ୍ଟା କରିବା ପ୍ରତ୍ୟେକ ମୁସଲମାନ ପକ୍ଷରେ ଅତ୍ୟନ୍ତ ଜରୁରୀ, ଯଦ୍ଵାରା ସେ ଈଶ୍ୱର ପ୍ରାପ୍ତି ଏବଂ ତାହାଙ୍କ ସାନିଧ୍ୟ ଲାଭ କରିବାର ଗୌରବ ଅର୍ଜନ କରିପାରିବ । ସୁତରାଂ ଜଣେ ମୁସଲମାନର ଈଶ୍ୱର ପ୍ରେମ ଯେ ନିଜ ଦେଶ ପ୍ରତି ପ୍ରେମ ଓ ସଦ୍ଦିଛା ପୋଷଣ କରିବାରେ କୌଣସି ପ୍ରକାର ପ୍ରତିବନ୍ଧକ ସୃଷ୍ଟି କରିବ,ଏହା ଅସମ୍ଭବ। ଇସଲାମ ଏହା ମଧ୍ୟ ଶିକ୍ଷା ଦିଏ ଯେ କୌଣସି ପ୍ରତିକୂଳ ପରିସ୍ଥିତିରେ ମଧ୍ୟ ଆଇନକୁ ହାତକୁ ନେବା ଉଚିତ ନୁହେଁ କିମ୍ବା ଦେଶ ପ୍ରତି ବିଶ୍ବାସଘାତକତା କରି ଏହା ବିରୁଦ୍ଧରେ ଗୋପନ ଷଡ଼ଯନ୍ତ୍ର ରଚନା କରିବା ମଧ୍ୟ ଆଦୌ ଗ୍ରହଣୀୟ ନୁହେଁ। ଏହି ଆଦେଶକୁ ନିର୍ଦ୍ଦିଷ୍ଟ ରୁପେ ପାଳନ କରିବା ପାଇଁ ଇସଲାମର ସୁସ୍ପଷ୍ଟ ଶିକ୍ଷା ରହିଛି।

✍️ ଅନସାର ଅଲୀ ଖାଁ
ସାମାଜିକ କାର୍ଯ୍ୟକର୍ତ୍ତା, ଢେଙ୍କାନାଳ।