ଢ଼େଙ୍କାନାଳ : ମରଣ କେତେବେଳେ ଆସେ କେହି କହି ପାରେନା , ଏଇ ଯେମିତି ଜଣେ ଟ୍ରାକ୍ଟର ଚାଳକ ଚାଷ କାମ ସାରି ଘରକୁ ଫେରୁଥିବା ବେଳେ ପୋଲ ତଳକୁ ଟ୍ରାକ୍ଟର ଖସି ପଡ଼ିବା ସହ ଚାଳକଙ୍କର ମୃତ୍ୟୁ ହୋଇଛି। ସତେକି ଯେମିତି ମରଣ ଚାହିଁ ରହିଥିଲା ବାଟରେ ,ଆଉ ଦେଖିବା କ୍ଷଣି ମାଡ଼ି ବସିଲା। ଏମିତି ଏକ ଅଭାବନୀୟ ଘଟଣା ଘଟିଯାଇଛି ଖରଚୁଲି ଠାରେ। ସୂଚନା ଅନୁଯାୟୀ ହିନ୍ଦୋଳ ଉପଖଣ୍ଡ ରାସୋଳ ଥାନା ଅନ୍ତର୍ଗତ ନବକିଶୋର ପୁର ଶବର ସାହି ର ପୁନିଆ ନାହାକ ଙ୍କ ପୁଅ ବିରଞ୍ଚି ନାହାକ ପ୍ରତ୍ୟେକ ଦିନ ଭଳି ଗତକାଲି ରବିବାର ମଧ୍ୟ ଟ୍ରାକ୍ଟର ନେଇ ଯାଇଥିଲେ ଚାଷ କାମ କରିବାକୁ। ହେଲେ ଆଉ ଘରକୁ ଫେରି ନଥିଲେ। ଘରକୁ ଫେରିବା ବାଟରେ ଖରଚୁଲି ଠାରେ ଭାରସାମ୍ୟ ହରାଇ ପୋଲ ତଳକୁ ଖସି ପଡ଼ିଥିଲା ଟ୍ରାକ୍ଟର । ଯାହା ଫଳରେ ଘଟଣାସ୍ଥଳରେ ହିଁ ଚାଳକ ବିରଞ୍ଚି ଙ୍କର ପ୍ରାଣବାୟୁ ଉଡି ଯାଇଥିଲା। ଏ ଖବର ପ୍ରସାରିତ ହେବା ପରେ ସ୍ଥାନୀୟ ଅଂଚଳରେ ଶୋକର ଛାୟା ଖେଳିଯାଇଛି । ଏ ସଂପର୍କରେ ଖବର ପାଇ ରାସୋଳ ପୋଲିସ୍ ଘଟଣାସ୍ଥଳରେ ପହଂଚିବା ସହ ଶବ ବ୍ୟବଚ୍ଛେଦ ପାଇଁ ହିନ୍ଦୋଳ ଉପଖଣ୍ଡ ଚିକିତ୍ସାଳୟକୁ ପଠାଇଥିବା ଜଣାପଡିଛି।
