ଢ଼େଙ୍କାନାଳ : ଉତ୍କଳ ବିଶ୍ବବିଦ୍ୟାଳୟ ଦ୍ୱାରା ପରିଚାଳିତ ଯୁକ୍ତ ତିନି ଶେଷ ବର୍ଷ ପରୀକ୍ଷାରେ ବିଭିନ୍ନ ବିଭାଗରେ କୃତିତ୍ବ ହାସଲ କରିଥିବା ଶ୍ରେଷ୍ଠ ଦଶ ଜଣ ପରୀକ୍ଷାର୍ଥୀ ଙ୍କ ନାମ ତାଲିକା ପ୍ରକାଶ ପାଇଛି।
ଉକ୍ତ ତାଲିକାରେ ମଠକରଗୋଳା ମହାବିଦ୍ୟାଳୟର ଚାରି ଜଣ ଛାତ୍ରୀ ସ୍ଥାନ ପାଇଥିବାର ଅଧ୍ୟକ୍ଷ ଚିତ୍ତ ରଞ୍ଜନ ଦାଶ ପ୍ରକାଶ କରିଛନ୍ତି । ଅର୍ଥନୀତି ସମ୍ମାନ ରେ ଅନିତା ମଞ୍ଜରି ପାତ୍ର ଦ୍ୱିତୀୟ ସ୍ଥାନ,ଶିକ୍ଷା ବିଭାଗରେ ସନ୍ଧ୍ୟାବତୀ ପାଣି ପଞ୍ଚମ, ଦର୍ଶନ ଶାସ୍ତ୍ର ସମ୍ମାନ ରେ ଝୁନା ରାଉଳ ଷଷ୍ଠ ସ୍ଥାନ ହାସଲ କରିଥିବା ବେଳେ ରୂପାଲି ନାୟକ ସପ୍ତମ ସ୍ଥାନ ଅଧିକାର କରିଛନ୍ତି।
ଏହି ଖବର ପ୍ରଚାରିତ ହେବା ପରେ ଅଧ୍ୟାପକ ଅଧ୍ୟାପିକା, ଅଭିଭାବକ, ବୁଦ୍ଧିଜୀବୀ ଓ ଛାତ୍ର ଛାତ୍ରୀ ଙ୍କ ମହଲରେ ଆନନ୍ଦର ଲହରୀ ଖେଳି ଯାଇଛି। ଏହି ସଫଳତା ର ଶ୍ରେୟ ସମସ୍ତ ଅଧ୍ୟାପକ-ଅଧ୍ୟାପିକା ଓ ଛାତ୍ରଛାତ୍ରୀ ମାନଙ୍କୁ ଦେବା ସହ ଭବିଷ୍ୟତରେ ଏହି ଧାରା ବଜାୟ ରଖିବା ନିମନ୍ତେ ଅଧ୍ୟକ୍ଷ ଶ୍ରୀ ଦାଶ ଆଶା ପ୍ରକଟ କରିଛନ୍ତି ।