ଢେଙ୍କାନାଳ : ସଦର ବ୍ଳକ ଭାପୁର ଛକ ଠାରେ ବିଳମ୍ବିତ ରାତ୍ରିରେ ଏକ ଅଜଣା ଗାଡି ଧକ୍କାରେ ଜଣେ ମହିଳାଙ୍କ ମୃତ୍ୟୁ ଘଟିଥିବାର ଜଣାପଡିଛି ।
ମୃତ ମହିଳାଜଣଙ୍କ ଭାପୁର ବଣିଆଁସାହିର ସୁରେଶ ପଣ୍ଡାଙ୍କ ପତ୍ନୀ କୁନ୍ତଳା ପଣ୍ଡା ବୋଲି ଜଣାପଡିଛି । କୁନ୍ତଳା ଶନିମେଳାର ଅନ୍ତିମ ଦିବସରେ ଭାପୁର ଠାରେ କୀର୍ତ୍ତନ କରିବାକୁ ନିଜ କୀର୍ତ୍ତନ ସାଥୀ ମହିଳାଙ୍କ ସହିତ ଯାଇଥିଲେ । ସେଠାରୁ କୀର୍ତ୍ତନ ସାରି ଘରକୁ ଫେରୁଥିବା ସମୟରେ ବିଳମ୍ବିତ ରାତ୍ରୀ ପ୍ରାୟ ୧୨ ଘଟିକା ସମୟରେ ଭାପୁର ଛକ ଠାରେ ଏକ ଅଜଣା ଗାଡି ତାଙ୍କୁ ଧକ୍କାଦେଇ ଘଟଣା ସ୍ଥଳରୁ ଚାଲି ଯାଇଥିଲା । ଗାଡି ଧକ୍କାରେ କୁନ୍ତଳା ଗୁରୁତର ଆହତ ହୋଇ ରାସ୍ତାରେ ଛିଟିକି ପଡିଥିଲେ ।
ସ୍ଥାନୀୟ ଅଞ୍ଚଳବାସୀ ତାଙ୍କୁ ଗୁରୁତର ଆହତ ଅବସ୍ଥାରେ ଉଦ୍ଧାର କରି ଢେଙ୍କାନାଳ ମୁଖ୍ୟ ଚିକିତ୍ସାଳୟରେ ଭର୍ତି କରିଥିଲେ । ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲା । ପୋଲିସ ଏ ନେଇ ଏକ ଦୁର୍ଘଟଣା ଜନିତ ମାମଲା ରୁଜ୍ଜୁ କରି ଘଟଣାର ତଦନ୍ତ କରିବା ସହ ମୃତକଙ୍କ ଶବକୁ ବ୍ୟବଚ୍ଛେଦ ପରେ ପରିବାର ଲୋକଙ୍କୁ ହସ୍ତାନ୍ତର କରିଥିବାର ଜଣାପଡିଛି ।