ହିନ୍ଦୋଳ ଉପଖଣ୍ଡ ହାତୁରା ପଞ୍ଚାୟତ ଅନ୍ତର୍ଗତ ବଲସର ଉଚ୍ଚ ପ୍ରାଥମିକ ବିଦ୍ୟାଳୟରେ କ୍ରୀଡା ଓ ବାର୍ଷିକ ଉତ୍ସବ ମଙ୍ଗଳବାର ଦିନ ପାଳିତ ହୋଇଯାଇଛି । ଛାତ୍ରଛାତ୍ରୀ ମାନଙ୍କ ଦ୍ବାରା ବିଭିନ୍ନ ପ୍ରକାର ଖେଳର ପ୍ରତିଯୋଗୀତା ସହ ନୃତ୍ୟ ପ୍ରତିଯୋଗୀତା ମଧ୍ୟ ହୋଇଥିଲା। କୃତି ଛାତ୍ରଛାତ୍ରୀ ମାନଙ୍କୁ ପ୍ରଥମ, ଦ୍ବିତୀୟ ଓ ତୃତୀୟ ଭାବେ ପୁରସ୍କୃତ କରାଯାଇଥିଲା। କୃତି ଛାତ୍ରଛାତ୍ରୀ ମାନଙ୍କୁ ଗ୍ରାମର ବୟୋଜ୍ୟେଷ୍ଠ ବ୍ୟକ୍ତି ଓ ବିଭିନ୍ନ ବିଦ୍ୟାଳୟରୁ ଆସି ଯୋଗଦେଇଥିବା ଶିକ୍ଷକ ମାନଙ୍କ ଦ୍ବାରା ପୁରସ୍କାର ବିତରଣ କରାଯାଇଥିଲା। ଏହି ଉତ୍ସବରେ ମୁଖ୍ୟ ଅତିଥି ଭାବେ ହାତୁରା ପଞ୍ଚାୟତ ସରପଞ୍ଚ, ମୁଖ୍ୟ ବକ୍ତା ଭାବେ ଜନମଙ୍ଗଳ ବିଦ୍ୟାଳୟର ଶିକ୍ଷକ ଗୋପାଳ ମିଶ୍ର ଏବଂ ବିଦ୍ୟାଳୟର ଚେୟାରମେନ୍ ଉପସ୍ଥିତ ଥିଲେ। ସମସ୍ତ କ୍ରୀଡା ଏବଂ ମଞ୍ଚର ପରିଚାଳନା କରିଥିଲେ ବିଦ୍ୟାଳୟର ପ୍ରଧାନଶିକ୍ଷକ ବିଦ୍ୟାଧର ବେହେରା। ତାଙ୍କୁ ସହଯୋଗ କରିଥିଲେ ଅନିଲ୍ କୁମାର ନାଥ,ଅରୁଣ କୁମାର ନାଏକ, ସଚ୍ଚିଦାନନ୍ଦ ସାହୁ ଓ ଶର୍ମିଷ୍ଠା ସାହୁ। ପୁରସ୍କାର ବିତରଣ ଉତ୍ସବକୁ ଦେଖିବାପାଇଁ ଗ୍ରାମର ଓ ପଞ୍ଚାୟତର ବହୁ ଲୋକ ଆସି ଉପସ୍ଥିତ ରହିଥିଲେ। ପାଠପଢା ସହ ଖେଳକୁଦ ପ୍ରତି ଛାତ୍ରଛାତ୍ରୀଙ୍କ ଆଗ୍ରହ ବଢାଇବା ନିମନ୍ତେ ଉକ୍ତ ଉତ୍ସବ ପାଳନ କରାଯାଉଥିବା ନେଇ ମୁଖ୍ୟବକ୍ତା ମତପ୍ରକାଶ କରିଥିଲେ। କ୍ରୀଡା ଓ ବାର୍ଷିକ ଉତ୍ସବକୁ ନେଇ ଛାତ୍ରଛାତ୍ରୀ ମାନେ ବେଶ୍ ଉତ୍ସାହିତ ଥିଲେ।
